An hilomlom na kaanggutan
garo sipnoang kuyom-kuyom;
nakahagkos sa puso, siring sa tubig
na nagraraguso, daeng kanultulan;
Siring sa sarong hisong gapo,
Hinahagidhid an mapulot
na ugsong nin kasalan
tanganing sa sarong pirik-pisik
nin tubig na malipoton,
o malabnawon, maianod
an ati nin kalapaan.
Siring sa maitomon na tabnaw,
Dae mo mansay an kairaroman
na kun saimong imahinaron
siring man sana
sa pusong maitom;
nawawara an tunay
na kahulugan nin kulay:
maitom, madiklom,
mabataon, malapaon,
gabos daeng porma
nin tultulan.
Tagdo sana.
No comments:
Post a Comment